ဘယ်သူက ဘယ်လို ထုတ်လိုက်တဲ့ ဥပဒေလဲတော့ မသိ။ မလေးရှားမှာတော့ တော်တော် အပြောများ နေကြတယ်။ ဖုန်းတစ်လုံး ၀ယ်ပေးရင် မြန်မာမိန်းကလေး တစ်ယောက် ရပြီတဲ့ ကြားနေရတာတော့ ကြာပါပြီ။ ဒါပေမဲ့ ကိုယ်တိုင်ကလည်း ဘယ်မှမသွား သေသေချာချာလည်း မမြင်မတွေ့ဘူးတော့ မြန်မာအမျိုးသားတွေ (အချို့) ရဲ့ စိတ်ထဲမှာ တကယ် အဲဒီလိုကြီး ထင်နေမှန်း မသိခဲ့ဘူး။
လွန်ခဲ့တဲ့ ရက်ပိုင်းလေးအတွင်း ကမှ-
ကွန်မက စာရေးလေ့ရေးထ မရှိပါဘူး။ စာဖတ်နေရရင် ပျော်နေတတ်တဲ့သူပါ။ အခုတော့ တော်တော်ကို ရေးချင်လာလို့ပါ။
လွန်ခဲ့တဲ့ (၆) ရက်လောက်ကပေါ့လေ။ ကျွန်မဆီကို မြန်မာမိန်းကလေး အသိနှစ်ယောက် ရောက်လာခဲ့ပါတယ်။ တစ်ယောက်က အိမ်ထောင်သည် ကလေးတစ်ယောက်အမေပါ၊ (အသက်ကတော့ ငယ်သေးတယ် ၂၃ နှစ်ကျော်ပေါ့)။ နောက်တစ်ယောက်က အပျို (၁၉) နှစ်ကျော်ပဲ ရှိသေးတယ်။ နှစ်ယောက်လုံးက ကျွန်မနဲ့ တစ်ရပ်ကွက်ထဲ နေကြတာပါ။ သိပ်တော့ မရင်းနှီးပါဘူး။ သူတို့က ၂၅.၁၀.၂၀၁၀ ကမှ မလေးကို ရောက်လာတာပါ။ သူတို့က ပီနန် စက်ရုံမှာ အလုပ်ရပါတယ်။ ကျွန်မကလည်း ပီနန်ထဲမှာပါ။ သိပ်မကြာလိုက်ပါဘူး။ ၁၁.၁၂.၂၀၁၀ ည (၉) နာရီလောက်ကြီး သူတို့ ကျွန်မဆီ ရောက်လာပါတယ်။ သူတို့အသိ အမျိူးသားတစ်ယောက်က လိုက်ပို့ပါတယ်။ အလုပ်က ပင်ပန်းလို့ မလုပ်နိုင်တော့ဘူး ( ၀ ) လိုက်ပြီတဲ့။ အဆင်ပြေမယ်ဆိုရင် ဒီမှာ ခဏနေပြီး အလုပ်ရှာချင်တယ်တဲ့။ ကျွန်မကလည်း နေပေါ့။ အလုပ်လည်း ၀ိုင်းပြီးရှာပေးမယ်လို့။
အဲဒီမှာ စတော့တာပဲ။ လာလိုက်တဲ့ဖုန်းက တခုမှ အချိုးမပြေ။ ဒီကြားထဲ သူတို့က ဖုန်းစပီကာ ဖွင့်ပြောတော့ အကုန်ကြားနေရတော့တာပဲ။ တစ်ယောက်ကဆိုရင် ညီမလေး အခု ( ၀ ) သွားတော့ အဆင်မပြေဘူး မဟုတ်လား။ အကို့ဆီ လာနေပါလား။ ဒါပေမဲ့ လာမယ်ဆိုရင် မြန်မြန်လာပါ။ ( ၂၀ ) ရက်နေ့ အထိပဲ စောင့်နိုင်မယ် ( ၂၀ ) ရက်နေ့မှ မလာဘူးဆိုရင် တခြား ကောင်မလေး တစ်ယောက်ကိုပဲ ခေါ်လိုက်တော့မယ်တဲ့။ ကြည့်ပါဦး ပြောပုံကို။ နောက်တစ်ယောက်ဆိုရင် (သူက ဖုန်းဝယ်ပေးထားတဲ့ သူပါ) ညီမ အခုဘယ်မှာလဲ လာခေါ်မယ်ဆိုတာချည်းပဲ။ ကောင်မလေးက အဲဒီလူကို သိပ်မကြည်ဘူး ထင်ပါတယ် အခုရောက်နေတဲ့ နေရာကို မသိဘူးပဲ ခံငြင်းတာ။ အဲဒါနဲ့ အဲဒီလူက ညီမ မသိရင်လည်း အိမ်ရှင် အစ်မကို ပေးလိုက်ပါတဲ့။ အဲဒီညီမက အစ်မ မပြောနဲ့နော် ဆိုပြီး ခေါင်းတခါခါ လက်တခါခါနဲ့ ကျွန်မဆီကို ဖုန်းအတင်း ထိုးပေးပါတယ်။ ကျွန်မလည်း မပြောဘူး။ ဟိုလိုလို ဒီလိုလိုနဲ့ လိပ်စာအတိအကျ မပြောတတ်ဘူးလို့ ပြောလိုက်တယ်။ အဲဒီမှာ အဲဒီအကောင်က ကျွန်မကို ဘာပြောတယ်ထင်လဲ။ အစ်မပဲ စဉ်းစားကြည့်ပါ ကျွန်တော့်ဆီက ဖုန်းတော့ ယူပြီးတော့ ကျွန်တော့် ရှောင်နေလို့ ရမလားဗျ ဘာပဲပြောပြော ကျွန်တော့်လူ ဖြစ်သွားပြီပဲတဲ့။ တောက် ဒီ xxxxx စိတ်ထဲမှာတော့လေ ကောင်းချီး ပေးလိုက်တာ စုံသွားတာပဲ။ အပြင်မှာတော့ ဘာမှပြောတော့ပါဘူး။ ဖုန်းပဲချလိုက်တယ်။
ဖုန်းချပြီးတော့ ”ဟဲ့ နင်တို့လူက မလွယ်ပါလား”။ သူ့ဖုန်း ပြန်သာ ပေးလိုက်ပါတော့လားဆိုတော့၊ “မပေးနိုင်သေးပါဘူး ဖုန်းတစ်လုံး နည်းတာမှတ်လို့ သူတို့ ၀ယ်ပေးတော့ ကိုယ်ဖုန်းဝယ်မယ့် ပိုက်ဆံကို မြန်မာပြည် ပို့လို့ရတာပေါ့” တဲ့။ ဒါပေမဲ့ နင်တို့လူက သားပြော မယားပြော ပြောနေတာလေဆိုတော့ အစ်မရယ် အခုရှောင်နေလိုက်ရင် ပြီးတာပဲ။ သူ ဘာတတ်နိုင်တာ မှတ်လို့ မလေးရှားမှာက ဒီလိုပါပဲ ညီမတို့ ရောက်ခါစကဆို အဲဒီလိုပဲ လူတစ်ယောက် ဖုန်းဝယ်ပေးပြီးတော့ အဖြေ အတင်းတောင်းတာ ညီမကလဲ စဉ်းစားဦးမယ်ချည်း ပြောတာ (၁၀) ရက်လောက် ကြာတော့ ငါ့မကြိုက်နိုင်ရင်လည်း ဖုန်းပြန်ပေးဆိုပြီး ပြန်ယူသွားတယ်။ ဒါပေမဲ့ ညီမကလည်း မမှု့ပါဘူး။ ဖုန်းဝယ်ပေးချင်တဲ့ လူတွေများ တန်းစီနေတာပဲ။ ညီမပြောနဲ့ ဟိုအစ်မမှာတောင် ၀ယ်ပေးချင်တဲ့ လူတွေ အများကြီးဆိုပြီး အိမ်ထောင်ရှိတဲ့ တစ်ယောက်ကို လက်ညှိုးထိုးပြပါတယ်။
အဲဒါနဲ့ ကျွန်မက “ဟဲ့ နင်အိမ်ထောင်ရှိတာ ပြောမပြဘူးလား” ဆိုတော့ ပြောပြတယ် ကလေးဓာတ်ပုံတောင် ထုတ်ပြသေးတယ်တဲ့၊ သူတို့က မြန်မာပြည်မှာ အိမ်ထောင်ရှိရှိ မရှိရှိ စိတ်မ၀င်စားဘူး အစ်မကိုပဲ စိတ်ဝင်စားတယ်ဆိုပဲ။ ငါလဲ (မရိုမသေစကား) ငါ့ကိုယ် မပါသွားရင် ပြီးတာပဲ ဆိုပြီး အလိုက်သင့်နေ နေရတယ်။ ဒီရောက်မှ ငါ့လဲ စန်းတွေ ပွင့်နေလိုက်တာများ အံ့တောင်သြတယ်တဲ့။ သူပြောတာ ကြားရတော့ ဟိုတလောက အင်တာနက်မှာ ဖတ်လိုက်ရတာလေး သွားသတိရပါတယ်။ ရေးတဲ့ လူနာမည်တော့ မမှတ်မိတော့ပါဘူး။ မိန်းကလေးတွေလည်း မလေးရှားရောက်မှ ငါ အရမ်းစန်းပွင့်နေပါလားလို့ မထင်ပါနဲ့ဆိုတဲ့ စာသားလေးပါ။
အခုတော့ မြန်မာမိန်းကလေးဆိုရင် ကိုယ့်မြန်မာ အချင်းချင်းသာမက တခြားလူမျိုးတွေကပါ စော်ကားချင်လာကြပြီ။ မြန်မာ အမျိုးသားတွေကလည်း မြန်မာမိန်းကလေးတွေကို နှမချင်းစာနာပြီးတော့ (တချို့ကပြောပါတယ်။ သူတို့မှာ နှမ မရှိပါဘူးတဲ့။ နှမ မရှိရင်တောင်မှ အမေဖြစ်ဖြစ် အဒေါ်ဖြစ်ဖြစ် တူမဖြစ်ဖြစ် ဆွေမျိုးသားချင်း ထဲကပဲဖြစ်ဖြစ် နောက်ဆုံး သံယောဇဉ် တွယ်ဖူးတဲ့ မိန်းကလေးတော့ ရှိမှာပဲ) ကျေးဇူးပြုပြီးတော့ စာနာပေးကြပါ။ မိန်းကလေးတွေ ကလည်း ကိုယ့်အားကိုယ် အားကိုးစိတ်လေး မြှင့်တင်ပေးကြပါ။ ငါဒီမှာ ဘာလုပ်လုပ် မြန်မာပြည်က ဘယ်သူမှ သိမှာမဟုတ်ဘူးဆိုပြီး ထင်ရာ မစိုင်းလိုက်ကြပါနဲ့။ နောင်တစ်ချိန်ကျရင် နောင်တရပြီး စိတ်ဆင်းရဲရမှာကို စိုးရိမ်လို့ပါ။
ဒါမျိုး အကြောင်းအရာတွေနဲ့ ပတ်သက်ပြီး တကယ့်ကို ရင်မောပါတယ်။ ဟိုတလောက အင်တာနက်မှာ ပြည်ပမှ သူရဲကောင်းများ ဆိုတဲ့ ခေါင်းစဉ်နဲ့ စာသားလေးကို လူတော်တော်များများ ဖတ်လိုက်ရမှာပါ။ မိဝေးဖဝေး ကိုယ့်တိုင်းပြည်နဲ့ ဝေးပြီးတော့ စားဝတ်နေရေး အတွက် နိုင်ငံရပ်ခြားမှာ စွန့်စွန့်စားစား ငွေရှာနေရတဲ့ ပြည်ပက အလုပ်သမားတွေ အားလုံးဟာ သူရဲကောင်းတွေတဲ့။ ဘာပဲပြောပြောပေါ့လေ အားလုံးဟာ တမျိုးမဟုတ် တမျိုးတော့ အခက်အခဲ ရှိကြပါတယ်။ ကိုယ့်နိုင်ငံ၊ ကိုယ့်မိဘ၊ ကိုယ့်ဆွေမျိုး အပေါင်းအသင်းတွေနဲ့ ဝေးပြီး ရေခြားမြေခြားကို ရောက်နေတဲ့ အချိန်မှာ ကိုယ့်မြန်မာလူမျိုး အချင်းချင်း ရေနစ်သူကို ၀ါးကူ ထိုးတာမျိုး မလုပ်ဘဲနဲ့ ဖေးဖေးမမ စာစာနာနာနဲ့ ကူညီစောင့်ရှောက်ကြမယ်ဆိုရင် ယုံကြည်ပါတယ်။ မြန်မာလူမျိုးဆိုရင် ဘယ်သူက နှိမ့်ချရဲမှာလဲ။ စော်ကား ရဲမှာလဲ။
စာရေးသူ အမည် မသိ၍ သိလျှင် ပြောပြပေးပါ။
ရတနာပုံ နေပြည်တော် သတင်းစာမှ ကူးယူပါသည်။
No comments:
Post a Comment