သို့
ခင်ဗျားကြီး
ခင်ဗျားကြောင့် ကျူပ်တို့အားလုံး ပြာကျနေပါပြီ။ ကျူပ်တို့က မြေပြင် အနှံ့အပြား ခင်ဗျားလက်ဝါးနဲ့ အုပ်ခံထားရချိန်မှာ မွေးတယ်။ ဒီတော့ ကျူပ်တို့က အပြင်က အလင်းကို မတွေ့ရဘူး။ ကျူပ်တို့က ကျူပ်တို့ မိသားစု အတွက်ပဲ သိအောင် ခင်ဗျားက ကျူပ်တို့စိတ်ကို ချုပ်ကိုင်ထားပုံက ပိပိရိရိ။ ဟုတ်တယ် ခင်ဗျားကိုထိရင် ပြာကျမယ်ဆိုတာကို အဖေကလည်း ပြောဖူးတယ်။ အမေကလည်း ဆုံးမဖူးတယ်။ ဒါကလည်း တစ်နည်းတစ်ဖုံနဲ့ ကျူပ်တို့ ပြာကျနေတာပဲ မဟုတ်လား။ ကျူပ်တို့ရဲ့ သွေးတွေနဲ့ ခင်ဗျားကတော့ ရွှေဝါရောင် သင်းသင်းနဲ့ လင်းချင်တိုင်း တိုင်းလင်းလို့နေတာပဲ မဟုတ်လား။ ကျူပ်တို့ကတော့ “တောက်” ဆိုတဲ့ အသံကိုတောင် ကျယ်ကျယ်မခေါက် ရဲတဲ့ ဘ၀လေ။ ကျူပ်တို့က အမှန်ဆိုရင် ခင်ဗျားကို မကြောက်ပါဘူး။ ခင်ဗျားရဲ့ အောက်လမ်းပညာတွေ၊ လက်နက်တွေ၊ ပါဝါတွေကိုပဲ ကြောက်ကြောက်နေရတာ။ တယောထိုးနေတဲ့ နီရိုးဘုရင်ကြီးက ခင်းဗျာဆီကပဲ ပညာတွေ သင်ခဲ့သလားလို့၊ ကျူပ်တို့ တစ်ခါတစ်ခါ စဉ်စားမိတိုင်း မထိပြုံးလေးပြုံးပြီး ရယ်ချင်တယ်။
ခင်ဗျားက မှော်ဆရာတစ်ယောက်လိုပဲ လို့တော့ ကျူပ်တို့ မိသားစုတွေက မကြာမကြာ ပြောဖူးတယ်။ ခင်ဗျား ဟတ်ချလောင်းလို့ တစ်ခါလုပ်တိုင်း ကျူပ်တို့တွေ တအံ့တသြဖြစ်ပြီး ကျုပ်တို့ ဘ၀တွေ ပြောင်းပြောင်း သွားစေတာပဲ မဟုတ်လား။ နောက် ခင်ဗျားက အုပ်စုဖွဲ့ အမဲလိုက်တဲ့ ခွေးအတွေလိုပဲ။ ကျူပ်တို့ ဘ၀တွေကို အရိုးပါမကျန် စားသောက်ပစ်တက်သေးတယ်။ ခင်ဗျားရဲ့ မနက်အိပ်ယာ ထရင် မျက်နှာသစ် ဖို့ထက် ဓားသွေးနေတတ်တဲ့ အကျင့်ကရော ဘယ်တော့မှ ပျောက်မှာလည်း။ ကျူပ်တို့ဘ၀ တွေကတော့ ဒီခင်ဗျားရဲ့ ပါးပါးလှီးခံခြင်းမှာ နေသားကျလို့နေပါပြီ။ နောက်ခင်ဗျားက ကမ္ဘာမှာ အတော်ဆုံးသော ဒါရိုက်တာ တစ်ယောက်ဆိုတာ လူတိုင်းသိတယ်။ ခင်ဗျားရဲ့ ဇာတ်လမ်းတွေမှာ ကျူပ်တို့က လူကြမ်းတွေ အဖြစ်ပဲ သရုပ်ဆောင်ရမှာ မဟုတ်လား။
မင်းသား ကဘယ်သူလဲလို့ ကျူပ်တို့မှာ မေးခွင့်မရှိဘူးဆိုတာ ကျူပ်တို့သိတယ်။ ခင်ဗျားနဲ့ ခင်ဗျား ပတ်ဝန်းကျင် မှန်သမျှ ခင်ဗျားတင်တဲ့ မင်းသားတွေပဲ မဟုတ်လား။ ကျူပ်တို့ ခင်ဗျားကြောင့် ညတိုင်းလိုလို အိပ်မက်ဆိုးတွေ မက်တယ်။ အဲဒါ ဘာအိပ်မက်လဲလို့ ခင်ဗျားမမေးနဲ့ ခင်ဗျားရဲ့ ကောက်ကျစ်စဉ်းလဲမှု မီးထဲ ကျူပ်တို့အရိုးတွေ တကြွတ်ကြွတ်နဲ့ မီးတောက်လောင်နေတဲ့ မြင်ကွင်း ရင်ထဲက ထုတ်မရဘူး။ ဘာပဲပြောပြော ခင်ဗျားကြောင့် ပြာကျခဲ့တဲ့ ကျူပ်တို့ ဘ၀များဆိုပြီး သမိုင်းမှတ်တမ်းကတော့ တစ်ချိန်ချိန် မှာပေါ်လာမှာပဲ။ အဲဒီအချိန်ကျရင် အဲဒီသမိုင်းမှာ ခင်ဗျားမင်းသား မဖြစ်စေရဘူး။ အခု ကျူပ်တို့မိသားစု တွေပြာကျ ခံနေရတာ ကျူပ်တို့သွေးနဲ့ ရေးတဲ့ ကျူပ်တို့သမိုင်းပဲ။ ခင်ဗျားလည်း ငရဲဘုံမှာ သာယာပါစေလို့ ကျူပ်ဆုတောင်းပေးရင် ဒီစာကို နိဂုံးချူပ်လိုက်တယ်။ ဘာပဲပြောပြော ခင်ဗျားဘ၀ ပြာကျတဲ့အခါ ကျူပ်တို့ကို သတိရပါ။
ခင်းဗျားကြီးရဲ့
ကျူပ်တို့
အာဂ
No comments:
Post a Comment