ကြည့်နေရုံမှတပါး အခြားမရှိ

 သူကြည့်နေတာ ကြာပြီ။ လမ်းမကြီးတလျှောက် ဥဒဟိုသွားလာနေသော ကားတွေ ဆိုင်ကယ်တွေ ကြားထဲက သားအဖနှစ်ယောက်။ သားဆိုတာထက် သမီးဆိုလျှင် ပိုမှန်မည်ထင်သည်။ အဖေဖြစ်သူက ခြေမပါ။ လက်နှစ်ဖက် အားပြုပြီး ပေါင်ရင်းက တာယာဘတ်ကြီးခံက သွားနေရသည်။ သမီးကလေးကတော့ သီချင်းကလေးဆိုရင်း ရှေ့က သွားလိုက် နောက်ပြန်လှည့်ကြည့်လိုက်နှင့်။ ခဏကြာလျှင် အဖေဖြစ်သူကုို ပြေးဖက်လိုက်။ စကားတွေပြောလိုက်နှင့်။ အေးအေးလူလူပင်။ ဆိုင်ကယ်နှင့်ကား အလွန်ရှုပ်သော ဖားကန့် -လုံးခင်း ကားလမ်းပေါ်မှာတော့ သူတို့ သားအဖနှစ်ယောက်က ကိုယ့်ရည်ရွယ်ရာလမ်းကို ကိုယ်သွားလျှက်။ သူကြည့်နေရင်းမှာပဲ ဘယ်သူမှန်းမသိသော သူတစ်ယောက်က ထိုသားအဖ နှစ်ယောက်နားသို့ ချဉ်းကပ်သွားသည်။ သူလည်း လက်ဘက်ရည်သောက်ရင်း စူးစူးစိုက်စိုက် ကြည့်နေမိသည်။ ထို့နောက် သူတို့တွေ အပြန်အလှန်ပြောနေကြသော စကားတွေကို လက်ဘက်ရည်ဆိုင်က ဖွင့်ထားသော သီချင်းကို ကျော်လွန်၍ နားစွင့်နေမိသည်။

အမည်မသိ ထိုလူက -

“သမီး“

ကလေးက ဘာမသိ ညာမသိ လူတစ်ယောက်က ခေါ်တော့ ကြောင်ပြီးကြည့်နေ၏။

“သမီး လာပါဦး ဦးနားကို“

ကလေးကမသွားရဲ။ ကလေး၏ အဖေက ထိုလူကို ခက်မာမာ ကြည့်နေသည်။

“သမီးက ဦးကို ကြောက်နေတာထင်တယ် မကြောက်ပါနဲ့ သမီးရဲ့ ဦးနားကို လာပါဦး“ ထိုလူက ကလေးနားတွင် ထိုင်ချလိုက်သည်။ ပြီးနောက် ကလေး၏ အဖေကို ကြည့်ပြီး

“ကလေးကိုချစ်လို့ပါ အစ်ကို“ ကလေးအဖေကဘာမှမပြော။

“အစ်ကို့ကို တစ်ခုလောက် ခွင့်တောင်းချင်ပါတယ်၊ ကလေးကို မုန့်ဖိုးပေးချင်လို့ပါ ခွင့်ပြုပါအစ်ကို ဒီအတိုင်း ပေးရင်လည်း အစ်ကို့ကို စော်ကားရာ ရောက်မှာစိုးလို့ပါ“

ကလေး အဖေက တွေတွေကြီး စိုက်ကြည့်နေ၏။ နောက်မှ-

“ရပါတယ်ဗျာ ခွင့်တောင်းစရာ မလိုပါဘူး သမီး သွားလိုက်လေ လူကြီးခေါ်နေတယ် “

ကလေးက ကြောက်ကြောက်ရွံ့ရွံ့နှင့် ထိုလူနား ကပ်သွားသည်။

“သမီး အဖေဘာ ပြောထားလဲ လူကြီးရှေ့မှာ လက်ပိုက်ထားရမယ်လို့ မမှတ်မိတော့ဘူးလား“

ကလေးက လက်ပိုက်၏။  ထိုလူက -

“သမီး ရော့ မုန့်ဖိုး“ ပိုက်ဆံ သောင်းဂဏန်းထက် မလျှော့သော ပိုက်ဆံတွေကို ကလေးကကြည့်ရင်း မယူရဲ။

“ယူပါသမီးရဲ့ ဦးက မုန့်ဖိုးပေးတာပါ အစ်ကို ကျနော့်မှာက မောင်နှမသားချင်း မရှိပါဘူး ကလေးတွေကိုမြင်ရင် ချစ်တတ်တာ ကျနော့်ရဲ့ အကျင့်လို ဖြစ်နေပါပြီ။ အစ်ကိုတို့က ဘယ်ကိုသွားမှာလဲ ဘယ်မှာနေတာလဲ“ ထိုအဖြေကို ကလေးအဖေက ချက်ချင်းမဖြေနိုင်။

မျက်ရည်တွေ ဝေ့သီစွာဖြင့် “အစ်ကိုတို့မှာ သွားစရာကတော့ သတ်သတ်မှတ်မှတ် မရှိပါဘူး၊ ဘယ်မှာနေလဲ ဆိုတာတော့ တွေ့ရာ ကင်းတဲ မြောင်းဘေး တံတားအောက်တွေမှာ နေတာပါပဲ။ အစ်ကိုက ဘယ်မှာနေနေပါ ဘ၀က ဆုံးနေပါပြီ။ သမီးအတွက်သာ“

အသံတို့ တိုးလျှသွားသည်။ ထိုလူက ဘာမှ ပြန်မပြောနိုင်။ သြော်ဟူသော အံ့သြသံလေးလိုက်ပြီး သက်ပြင်းလေး ချလျှက်။ ကလေးအဖေက “သွားတော့မယ်၊ သမီး ဦးကို ကန်တော့လိုက်ဦး“ ကလေးက မြေကြီးပေါ် ထိုင်ချလျှက် ထိုလူကို ကန်တော့နေရှာသည်။ ထို့နောက်တော့ လမ်းမကြီး အတိုင်း အဆုံးမရှိဆက် လက်ထွက်ခွာသွားတော့သည်။ ခပ်လှမ်းလှမ်း ရောက်တော့ ကလေးက ထိုလူဖက်လှည့်ကာ လက်ကလေးပြ ဘိုင့်ဘိုင် လုပ်နေပြန်သည်။ ထိုလူလည်း လာလမ်းနှင့်ဆန့်ကျင်ဖက် အရပ်ဆီသို့ ထွက်ခွာသွားတော့သည်။

ကျနော်ကတော့ လက်ဘက်ရည်ဆိုင် အတွင်းမှာ အတွေးတွေ ဆက်လက်ပွားနေမိပြန်သည်။ ဒီ သားအဖ နေ့စဉ်နေ့တိုင်း ဒီလိုပဲ သွားနေကြတာလား။ မှော်ထဲက လမ်းတွေက ကြမ်းကကြမ်းပါဘိနှင့်။ တစ်ခါတစ်ရံ မိုးများရွာထားလိုက်လျှင် ဗွက်တောပေါက်ပြီး ဆိုင်ကယ်တွေ လူတွေ ဒုက္ခရောက်ကြရသည့်နေ့ တွေမှာရော?။ တွေးရင်း ရင်မောမိပြန်သည်။ ဖခင်က မည်သို့သော အကြောင်းတရားတွေကြောင့် သည်လို ဘ၀ကို ပိုင်ဆိုင်ခံရသည်ကို မသိပေမယ့် တွေးပူမိသည်က ကလေး၏ အနာဂတ်။ လမ်းပေါ်မှာ ဘ၀ကို အဆုံးသတ်လိုက်တော့မည်လား။ ကလေးကိုကြည့်တော့ အလွန်ဆုံးရှိမှ ၇ နှစ်။ ကျောင်းနေအရွယ်။ ကျောင်းနေရမည့် အရွယ်မှာ ဖခင် ဒုက္ခိတကို အဖော်ပြုရင်း လမ်းမပေါ်မှာစား လမ်းပေါ်မှာ အိပ်ရရာ ဘ၀ကို ပျော်နေရသည်။ လှပသည့် အိပ်မက်တွေကိုရော မက်မှ မက်တတ်ပါမည်လား။

ဖားကန့် လမ်းတွေပေါ်မှာ ထိုသားအဖကို နေ့တိုင်းနီးပါး တွေ့နေရသည်။ ဘ၀ပေးအခြေအနေကြောင့် ဆိုပေမယ့်လည်း စိတ်ထဲတော့ ချည့်နဲ့အောင် ခံစားရသည်။ တစ်ချို့က ခြေလက်အင်္ဂါ စုံလင်ပေမယ့် လိမ်လည် စားသောက်နေကြသည်။ ထိုလူတွေထက် စာရင်တော့ ဒီသားအဖအဖြစ်က တော်ပါသေးသည်။ သဘောရိုးရိုးနှင့် ကြည်လင်နေသည့် သူတို့၏ မျက်ဝန်းတွေက သူတို့၏ အကျင့်တွေကို လှစ်ဟပြနေသလို။ တဘက်သတ် အမြင်စောင်းနေတတ်သော လူတွေကတော့ ထိုအတိုင်း မြင်မည်မဟုတ်။ လမ်းမပေါ် ရောက်နေကြသော ကလေးသူငယ်တွေ ဘယ်လောက်တောင် များနေမလဲဟု တွေးမိလိုက်ပြန်လျှင် ရင်မောရပြန်သည်။ အတိတ်ကံမကောင်းလို့သာ သည်ဘ၀ကို ပိုင်ဆိုင်ရသည်ဟု ဖြည့်တွေးရန်မှ တစ်ပါး အခြားစိတ်သက်သာရာ မရှိတော့။ စောစောက စာနာစိတ်ရှိသော အမည်မသိသူတစ်ယောက်တော့ သူလုပ်နိုင်တာကို လုပ်သွားခဲ့သည်။ သောင်းဂဏန်းထက်ကျော်သော ပိုက်ဆံတွေကို မုန့်ဖိုးဟု ပြောပြီးပေးသွားသည်။ ထို့ထက်ပို၍ ကလေး၏ ဘ၀ကို တာဝန်ယူ အနာဂါတ်ကို လှပအောင် ပြုလုပ်ပေးလျှင် ဘယ်လောက်တောင် ကောင်းမလဲဟု တွေးကြည့်သေးသည်။ လူတိုင်း ကိုယ့်အပူနှင့်ကိုယ် ဆိုတော့လည်း ဘယ်မှာ စိတ်ကောင်း အမြဲထားနိုင်ပါမည်လဲ။ လူတစ်ခု ပူမိရယ်တဲ့ ဆယ်ကုဋေ ဆိုသည့်စကားအတိုင်း ကိုယ်ဝမ်းကိုယ်သာ အနိုင်နိုင် ကျောင်းနေကြရသည်။ ကျနော်တောင် စောစောက ကလေးကို တစ်ထောင်လောက်တောင် မပေးကမ်းနိုင်ခဲ့သေးတာပဲ။ ထိုလူက ကျနော့်ထက် သတ္တိပိုရှိပါသည်။ မှော်ထဲမှာ ၀က်သား တစ်ပိဿာဖိုးလောက်ရှိသော ငွေပမာဏကို ထိုလူက ရက်ရက်ရောရော ပေးသွားခဲ့သည်ပဲ။ ၀က်သားစားနိုင်ဖို့ သောင်းဂဏန်းလောက် အကုန်ခံပြီး မစားနိုင်သည့် ကျနော့်ထက်တော့ ထိုလူက သာပါသေးသည်။ ထိုင်ကြည့်နေရုံသာ တတ်နိုင်သော ကျနော့်အဖို့ သနားသည်ဆိုတာလည်း စိတ်ထဲ၌သာ ရှိပါသည်။ စိတ်ကောင်းထားသည် ဆိုတာကို စိတ်ထဲ၌သာ ကောင်းကောင်းထားနိုင်တော့သည်။ ထို့ကြောင့် လက်ပိုက်၍သာ ကြည့်နိုင်နေရုံမှ တစ်ပါး… အခြားမရှိတော့ပြီ။

သော်

The Mandalay Gazette မူးကူး ဖော်ပြပါသည်။