ဖြစ်ရပ်မှန်

တစ်ကျောင်းတစ်ဂါထာ တစ်ရွာတစ်ပုဒ်ဆန်း ဟူသော စကားပုံသည်လော ဆိုရိုး သည်လော ထိုသောဝေါဟာရသည် လွန်စွာအံ့မခန်း မှန်ကန်လွန်းလှပါတော့၏။

ကျွန်ုပ်အဝင်ပါဖြစ်သော သက်ရှိလူသားတို့သည် မိမိတို့ မှီတင်းနေထိုင်ရာ ပထဝီရေမြေကို လိုက်၍ ဒေသခံတို့၏ ဓလေ့စရိုက်နှင့် အမူအကျင့်တို့သည် မြားမြောက်စွာ ကွဲပြားခြားနား ကြကုန်လေ၏ ဆိုခြင်းကို အထူးရည်ညွန်းရန် မလိုအပ်လှပေ။ ဒေသအရပ်တစ်ခုမှသည် ပတ်ဝန်းကျင်တစ်ခုတို့၏ ဓလေ့စရိုက်တို့သည် ရံခါတွင် လွန်စွာမှ ဆန်းပြားကြကာ လားလားမှ စေ့စပ်၍မရလောက်အောင်လည်း ကွဲပြားခြားနားကြကုန်၏။ ပြောမယ့်သာပြောရတာပါ ငိုအား ထက်ရီအားသန်လား ရီအားထက်ငိုအားသန်လားတော့မသိ အူကြောင်ကြောင်ဖြစ်မိတာ ကတော့ အမှန်ပါဘဲ။ လူတို့၏ သဘာဝအရ စား၊ ဝတ်၊ နေရေး ဆိုတဲ့ အကြောင်းသုံးပါး ထည်းက ပုံစံအမျိုးမျိုးနဲ့ အဟာရကိုမှီဝဲပြီးလျှင် ဒီတိုင်းနေလို့ မရတဲ့ကိစ္စကတော့ဖြင့် အိမ်သာတက်ရခြင်းပါဘဲ။ အိမ်သာတက်ခြင်းအမှုကို ပွဲတော်တစ်ခု အလား စည်စည်ကားကား ကျင့်ပကြတဲ့ ရွာသားအချို့ကို မိမိကိုယ်တိုင် ကြုံတွေ့ ခဲ့ရဘူးပါတယ်လို့ ပြောရပါလျှင်တော့ ယုံကြည်နိုင်ကြပါမည်လား?။ ကျွန်တော့်အသက် ခပ်ရွယ်ရွယ်လောက်တုန်းကပါ မြန်မာပြည် အောက်ပိုင်း ဒေသခံတိုင်းရင်းသားတွေနေတဲ့ တောမကျ မြို့မကျ ရွာကြီးတစ်ရွာကို ကျွန်တော်ရောက်ရှိသွားခဲ့ဘူးပါတယ်။

အဲ့သည်ရွာကြီးမှာ ကားလမ်းမှသည် မီးရထားလမ်း ပင်လယ်ရေတက်ရေကျ ချောင်းကြီးများအထိ ရှိကြပါ၏ စီးပွားရေးလည်းအလွန်ကောင်းမွန်ပြီး စည်စည်ကားကား ရှိလှတဲ့ ရွာကြီးလည်းဖြစ်ပါသည်။ ပင်လယ်ထွက်ကုန်ပစ္စည်းများ ဖောက်ကားရောင်းဝယ် ကြခြင်းကို အထူးပြုလုပ်ကြပြီး ရာဘာစေး၊သစ်၊ဝါး အစုံလည်းထွက်ပါသည်။ ကျွန်တော် ကြုံခဲ့ရဘူးတဲ့ ပွဲတော်က လူစည်ကားရာ ရွာလည်ခေါင်မှာ မဟုတ်ပါဘူး ရွာရဲ့ အနောက်ဘက် အစွန်တစ်ခုဖြစ်တဲ့ သင်္ချိုင်းကုန်းအနီးမှာရှိတဲ့ အိမ်ခြေ တစ်ရာကျော်ကျော်လောက်ရှိတဲ့ အုပ်စုကလေးမှာပါ။ အခြာသောအစွန်းပိုင်းတွေတော့ ကျွန်တော်မသိပါ။ ထိုအိမ်စုများမှ အနောက်စူးစူး ပင်လယ်ဘက်သို့ ပေါက်သော လမ်းဘေးတွင် ဆားဂိုဒေါင်ကြီးများနှင့် သင်္ချိုင်းကုန်းသည် တည်ရှိနေပါ၏။ ထိုအိမ်စုတို့သည် ကွက်သစ်သဘောမျိုးဖြစ်ကာ အိမ်တိုင်းတွင် အိမ်သာမရှိကြပေ ရှိသောအိမ်သာများသည်လည်း အရေးပေါ်ကိစ္စတွက် တည်ဆောက်ထားခြင်းသာဖြစ်ကြကုန်၏။ အကြောင်းမှာ ပင်လယ်ရေနီးပိုင်း မြေဖြစ်၍ သုံးပေခန့် မျှတူးလိုက်လျှင် ရေငန်များထွက်လာကာ တွင်းပြိုကျသောကြောင့်ဖြစ်၏။ အကယ်၍ အိမ်သာကျင်းနက်နက်တူးပြီး ကောင်းကောင်းလုပ်လိုလျှင် ဆားငန်ရေခံနိုင်သော အုပ်၊အင်္ဂတေတို့ဖြင့် အခိုင်မာတည်ဆောက်ရသောကြောင့် ငွေကြေးကုန်ကျမှု အခက်ခဲ ရှိကြရ၏ ထို့ကြောင့်ပင်လျှင် ထိုပွဲတော်ကြီး ဖြစ်ပေါ်လာပုံပေါ်လေသည်။
ကျွန်တော်က အဲ့သည်ဒေသက ဆားတွေကိုဝယ်ပြီး မြန်မာပြည် အထက်ဘက်ကို
ပို့တဲ့ သူဋ္ဌေးတစ်ယောက်စီမှာ ပညာသင်တစ်ဖြစ်လည်းအလုပ်လုပ်ပါတယ် ကျွန်တော့်အလုပ် က ဝယ်လိုက်တဲ့ဆားတွေရဲ့ အလေးချိန်နဲ့ သယ်ယူပို့ဆောင်ရေးတွေကို ကြပ်မတ်ရတဲ့ အလုပ်ပါ။ တစ်နေ့ အရောင်းဝယ်တည့်သွားကြလို့  ဆားတွေရဲ့  အရည်အသွေးကို စစ်ဆေးဘို့  ဆားဂိုဒေါင်ကိုသွားတဲ့အခါမှာ ဒီပွဲတော်ကြီးကို မျက်ဝါးထင်ထင် တွေ့မြင်ခဲ့ရတာပါဘဲ။ ဂိုဒေါင်ကြီးတွေရဲ့ ဘေးပတ်ပတ်လည်မှာ ဆူးညောင့်ခလုပ်တွေကို အထပ်ထပ်ကာရံထားတာ ဟာ ခံတပ်ကြီးလားထင်မှတ်ရပါတယ် ကျွန်တော်မေးကြည့်တော့ ဆားကိုမည်သူမျှ ဂိုဒေါင် ဖောက်၍မခိုးကြောင်းနှင့် ဤကဲ့သို့ မကာရံထားပါက ဂိုဒေါင်ဘေးပတ်ပတ်လည်မှာ သက်တောင့်သက်သာနှင့် အိမ်သာလာ၍တက်ခြင်းအမှုကို ပြုကြပါလျှင် အလုပ်လုပ်၍ ရနိုင်တော့မည်မဟုတ်ကြောင်းကိုသိခဲ့ရပါတယ်။

ထိုနေ့နေ့လည်ချိန်များတွင် မိန်းမပျိုလေး တစ်ယောက်စ နှစ်ယောက်စတို့သည် ဆားကွင်းနှင့် သင်္ချိုင်းကုန်းတော၏ အစပ်တွင် ထီးကလေးများကာ၍ အိမ်သာတက် နေကြသည်ကို လှမ်း၍မြင်မိပါလျှင် ကန်တော်ကြီးနှင့် တိရိစ္ဆာန် ဥယျဉ်တို့၌ စုံတွဲများ ထီးကာ၍ ထိုင်နေကြပုံကို မြင်ယောင်မိပြီး ပြုံးလိုက်မိပါသေးသည်။ ညနေငါးနာရီခန့်မှာ ပျိုပျိုအိုအို ယောက်ကျား မိန်းမ လူကြီး ကလေး အရွယ်မျိုးစုံတို့ဟာ တစ်ဦးချင်းမှသည် နှစ်ယောက်တွဲ သုံးယောက်တွဲမှ လေးငါးခြောက်ယောက်တွဲအထိ အုပ်စုဖွဲ့ကာ သင်္ချိုင်းကုန်းတောစီသို့ အိမ်သာတက်ပွဲတော်ကို ချီတက်ကြလေကုန်၏။ ကျွန်တော် ထူးထူးဆန်းဆန်းဖြစ်လွန်း၍ အလွန်အမင်အံ့သြရမိခဲ့၏။ ကျွန်တော့်ထက်အသက်အနည်းငယ်စီကြီးသော ဒေသခံ ကုန်တင်ကုန်ချ အဖွဲ့များက ကျွန်တော့်အား ကြုံဘူးရန် တူတူသွားကြပါမည်ကြောင်း ဖိတ်မန်တကပြုသောအခါ သူတို့၏ ကမ်းလှမ်းချက်ကို လက်ခံလိုက်ပြီး သူတို့နှင့်အတူ ချီတက်လေတော့၏ သင်္ချိုင်းကုန်းတောကြီးသည် အတော်ပင်ကျယ်ဝန်းလှပေရာ အထည်းသို့ ရောက်လျှင် ဝဲယာအရပ်တို့ဖြင့် သူ့နည်းသူ့ဟန် ကျား၊မ ခွဲထားကြပုံရ၏။ ကျွန်တော် တစ်ဖက်သို့ စောင်းငဲ့ကြည့်လိုက်သောအခါ အချို့အမျိုးသမီးများသည် လမ်းများပေါ်တွင် ရပ်နေပြီး ကိစ္စမပြီးသေးသည့် အဖွဲ့သားများကို စောင့်နေကြဟန်ရှိ၏။ ကျွန်တော်တို့အဖွဲ့သည် အတွင်းပိုင်းသို့ ဆက်လက်ချီတက်ကြမိသောအခါ ခြုံတောကလေးဘေး၌ အသက်ခပ် လတ်လတ် လူသုံးယောက်သည် တန်းစီ၍ ဆောင့်ကြောင့်ထိုင်ကာ အိမ်သာတက်ခြင်း အမှုနှင့်အတူ အကြောင်းရာတစ်ခုကို ၎င်းတို့၏ ဘာသာစကားဖြင့် သူ့ထက်ငါ အော်ဟစ်ကာ အားရပါးရ ဆွေးနွေးနေကြသည်လား ငြင်းခုန်နေကြသည်လား ကျွန်တော်နားမလည်ပါ သူတို့ကိုကြည့်ရသည်မှာ အိမ်သာတက်သည်နှင့်မတူဘဲ လက်ဘက်ရည်ဝိုင်းတွင် စကားစမြည်း ပြောနေကြသည်နှင့်ပင် လွန်စွာတူတော့၏။

 ကျွန်တော့်မှာမူ ပဆိုးကို ခြုံထားပြီးလျှင် နှခေါင်းနှင့် ပါးစပ်တို့အား ပဆိုးစဖြင့် ကာထားပြီး မျက်လုံးနှလုံးကိုသာ ဖော်ထား၏။ ခပ်လှန်းလှန်းတွင်လည်း လူငယ် တစ်ယောက်သည် အုတ်ဂူတစ်ခုပေါ်တွင် အကျအနထိုင်ကာ ဇိမ်ကျနေပုံရ၏ အချို့အုဋ္ဌ်ဂူများ၌ အုတ်ဂူပေါ်တွင် အိမ်သာမတက်ကြပါရန် မေတ္တာရပ်ခံစာများ ရေးထားကြကုန်၏ ထိုစဉ်မှာပင် အဆိုပါသုံးယောက်မှ တစ်ယောက်သော သူသည် ကျွန်တော်တို့အဖွဲ့ဝင်တစ်ဦးထံမှ ဆေးလိပ်မီးတောင်းညှိုလေ၏ သူသည် လွန်စွာ အိနြေ္ဒရလွန်းလှသည်၊ အိနြေ္ဒမရဖြစ်နေသူမှာ ကျွန်တော်သာဖြစ်၏ သူတို့နှစ်ယောက် ဆေးလိပ်မီး အပြန်အလှန် ညှိုပြီးလျှင် ထိုလူမှ ကျွန်တော့်အခြေအနေကိုကြည့်ကာ အဝယ်တော်စာရေးလားဟုမေးသောအခါ ကျွန်တော် ခေါင်းညိတ်ပြလိုက်သည့်အခိုက် ထမင်းစားပြီးပြီလား ဟုမေးလေ၏။ ငုတ်တုတ်ကြီး အိမ်သာ တက်နေတဲ့သူက ကျွန်တော့်အား မေးလိုက်သော မေးခွန်းကို ဝိုင်းဝန်း၍သာ စဉ်းစားကြည့်ကြ စေချင်ပါသည်။ အားလုံး၏ မျက်နှာများကို ကျွန်တော်ကြည့်လိုက်သောအခါ ဘာမှထူးထူး ခြားခြားမရှိဘဲ ပကတိ အတိုင်းသာ ရှိနေကြကုန်၏ ထိုသူကျွန်တော့်အား လှောင်ပြောင်ခြင်း မဟုတ်ပေ ဤသည်က သူတို့၏ ဓလေ့ပင်လော?။

(ထိုဒေသရှိသူတို့သည် နံနက်ခြောက်နာရီ ခုနစ်နာရီခန့်တွင် နံနက်စာစားကြပြီး ညနေ လေးနာရီ ဝန်းကျင်တွင် ညနေစာ ကိုစားကြ၍ ငါးနာရီ ခြောက်နာရီ ခန့်တွင် ထိုချီတက်ပွဲကြီး ကို ကျင်းပကြလေ၏။ ဤသည်မှာ နှစ်အတန်ကြာခဲ့ပြီ ဖြစ်ပါ၍ ယ္ခုအခါတွင်မူ ထိုသူတို့၏ ဓလေ့တို့သည် ရှိတော့လိမ့်မည်မထင်ပါ။ အကယ်၍ ထိုဒေသမှ လူတစ်ယောက်ယောက် သည်၎င်း ကျွန်ုပ်ကဲ့သို့ ကြုံကြိုက်ဘူးသူတစ်ယောက်ယောက်သည် ဤယ္ခု ကျွန်ုပ်ရေးသား ထားပါသော ပို့စ်လော ဆောင်းပါးလောမသိသော ဤစာကြောင်းများကို ဖတ်ရှုမိပါလျှင် ပြုံး၍နေမိလိမ့်မည်ဟုမူ ကျွန်ုပ်ယုံကြည်မိပါသည်။)

( အရပ်ဒေသကိုမူ အကြောင်းကြောင်းကြောင့်မဖော်ပြတော့ပါ )

Written by: michaelaungpu On October 16, 2010.

ရတနာပုံနေပြည်တော်သတင်းစာမှ