အသက် ၁၁ နှစ်အရွယ်ရှိ သားဖြစ်သူသည် ကျောင်းသွားရန် ငြင်းဆန်နေသဖြင့် ရဲကို ခေါ်ပြီး လက်ထိပ်ခတ်ကာ ကျောင်းပို့ရသည့် အဖြစ်အပျက်တစ်ခု နယူးမက်ဆီကို၊ အာတီဆီးယားမြို့ ရီဆိုအထက်တန်းကျောင်းတွင် ဖြစ်ပွားခဲ့သည်။ သားဖြစ်သူသည် ကျောင်းသွားရန် ငြင်းဆန်သဖြင့် ပြောမရသည့် အဆုံးတွင် မိခင်သည် ရဲစခန်းသို့ ဖုန်းဆက် အကြောင်းကြားပြီး အကူအညီတောင်းခဲ့သည်။
ရဲမေတစ်ဦးသည် အိမ်သို့ရောက်လာပြီး သားကို လက်ထိပ်ခတ်ကာ ကျောင်းအ ရောက် ကားဖြင့်လိုက်ပို့ခဲ့သည်။ ကျောင်းရှေ့သို့ အရောက်တွင် ကားနောက်ခန်းမှ လက်ထိပ်တန်းလန်းဖြင့်သားကို ဆွဲထုတ်လာသည့် မြင်ကွင်းအား ကျောင်းရှိဆရာ များနှင့် ကျောင်းလာပို့ကြသော မိဘများမြင်တွေ့ပြီး စိတ်ဆိုးကြသည်။
ရဲက ကျောင်းသားကို လက်ထိပ်ဖြင့် ဆွဲခေါ်လာသည်ကို ဆရာများက မြင်ပြီးနောက် ရဲကို အပြစ်တင်ပြီး စုံစမ်းမေးမြန်းခဲ့ကြသည်။
ရဲက သူ၏ မိခင်နှင့် အဖွားဖြစ်သူတို့က ဖုန်းဆက်ခေါ်ပြီး သင်ခန်းစာပေးလိုသဖြင့် ယခုကဲ့သို့ လက်ထိပ်ခတ်ကာ ကျောင်းပို့ပေးရန် တောင်းဆိုသောကြောင့် ပြုလုပ်ရခြင်းဖြစ်ကြောင်း ရှင်းပြသကဲ့သို့ စခန်းသို့လည်း ဤအတိုင်း ပြန်လည်အစီရင်ခံခဲ့သည်။
သူ့အနေဖြင့် ကလေးသည် ကျောင်းသွားရန် ငြင်းဆန်ရုံမက ကစားကွင်းထဲသို့ ပြေးထွက်သွားသဖြင့် သူကိုယ်တိုင် လိုက်ဖမ်းကာ ခေါ်ခဲ့ရကြောင်း ရှင်းပြခဲ့သည်။
မိဘတစ်ဦးကမူ ယခုလုပ်ရပ်သည် လက်ခံနိုင်စရာ အကြောင်းမရှိ။ ကလေးသည် မည်မျှ ငြင်းဆန်သည်ဆိုစေ လူသားမဆန်စွာဖြင့် ဤသို့လက်ထိပ်ခတ်ပြီး ဆွဲခေါ်လာစရာ အကြောင်းမရှိ။ မိမိတို့အနေဖြင့် ဤသို့ အခြေအနေ ရောက်စေရန် ဖန်တီးသည့် မိဘများကို ရော၊ ရဲကိုပါ ကန့်ကွက်ကြောင်း ပြောကြားခဲ့သည်။
ရဲစခန်းမှ တာဝန်ရှိသူများက ပြဿနာသေးသေးလေးကို ကြီးထွားစေရန် အကူအညီပေးသည့်ရဲမေအား စုံစမ်းစစ်ဆေးလျက် ရှိကြောင်း သိရသည်။ ကျောင်းအာဏာပိုင်များကမူ ယခုကိစ္စကို မိမိတို့ကျောင်းမှ သီးခြား အရေးယူစစ်ဆေးသွားမည်ဟုဆိုသည်။
No comments:
Post a Comment