ရန်ကုန်မြို့တော်ခန်းမကြီးသည် ဗြိတိသျှ အစိုးရလက်ထက်က အင်ဂျင်နီယာ မင်းကြီး စည်သူဦးတင်က တည်ဆောက်ခဲ့ ပါသည်။ စည်သူဦးတင်၏ အဘိုး ဦးကြင်မှာ မင်းတုန်းမင်းတရား လက်ထက်က အင်ဂျင်နီယာ စက်မှု ဝန်ထမ်းတစ်ဦး ဖြစ်ပြီး အဘွား ဒေါ်ခင်မိမိမှာ မင်းတုန်းမင်း လက်ထက်က အထိန်းတော်ကြီး တစ်ဦးဖြစ်ကြောင်း သိရသည်။ ယခုအခါ ထို ရန်ကုန်မြို့တော်ခန်းမ အဆောက်အအုံအား ပြန်လည် ပြုပြင်ရာတွင် အဆောက် အအုံ၏ ဆေးရောင်အား ယခင်ကတည်းက ရှိနေခဲ့သော အဝါရောင်မှ ယခုအခါ ဗေဒါနုရောင်သို့ ပြောင်းလဲလိုက်ပြီ ဖြစ်ကြောင်း သိရသည်။
မတ်လကုန် ပထမအကြိမ် ပြည်ထောင်စု လွှတ်တော်ပုံ မှန်အစည်းအဝေးများ ပြုလုပ်ပြီးချိန် တွင် ရန်ကုန်မြို့တော် စည်ပင်သာယာရေး ကော်မတီသည် ၂၀၁၁ခု ဧပြီ ၁ ရက်မှ စတင်၍ ကော်မတီအဆင့်မှ စည်ပင်သာယာရေး ဝန်ကြီးဌာန အဆင့်သို့ ရောက်ရှိပြီး နောက်ပိုင်း ဧပြီ လဆန်းတွင် မြို့တော်ခန်းမ အဆာက်အအုံ တစ်ခုလုံးအား ပြန်လည် ပြုပြင်ခြင်း ဖြစ်သည်။
ထိုသို့ ပြုပြင်ရာ တွင် မူလလက်ရာ ပုံစံကို အကြီးစား၊ အသေးစား၊ ပြုပြင်ခြင်း မဟုတ်ဘဲ ဆေး အပိုင်းသာ ပြန်လည်ပြုပြင်ခြင်း ဖြစ်သည်ဟု သိရသည်။ ရန်ကုန်မြို့တော်ခန်းမ အဆောက်အအုံ အား ဆေးသုတ်ရာတွင် စည်ပင်သာယာရေး ဝန်ကြီးဌာန အောက်ရှိ အင်ဂျင်နီယာဌာန (အဆောက်အအုံ)မှ ပုဂ္ဂလိက လုပ်ငန်းရှင်များ က ပုတ်ပြတ်စနစ်ဖြင့် လုပ်ကိုင်ခြင်းဖြစ်ကြောင်း ယင်းအဆောက်အအုံအား တာဝန်ယူ လုပ်ကိုင်နေသည့် ကန်ထရိုက်တစ်ဦးက ပြောသည်။
မြို့တော်ခန်းမအဆောက်အအုံ ဆေးသုတ်ရာတွင် ၁၁၅ဒဿမ၇၇ အဆင့်ရှိ ဗေဒါနုရောင်သို့ အဆောက်အအုံ တစ်ခုလုံးအား ပြောင်းလဲမည်ဖြစ်ပြီး ဗေဒါအရောင့်ဖျော့အား အဆောက် အအုံခါးပတ်၊ ကနုတ်နှင့် အခြားအစိတ်အပိုင်းများတွင် ဟိုက်လိုက်ထည့်သွင်း၍ အဆောက် အအုံ အောက်ခြေအား ချောကလက်အရောင် သုတ်မည် ဖြစ်သည်။
“အဆောက်အအုံ တစ်ခုလုံးကို ဗေဒါရောင်၊ ချောကလက်အရောင်နဲ့ ပြုပြင်သွားမှာပါ။ နံရံရေဆေး၊ ပြတင်းပေါက် ဆီဆေးသုတ်မှာပါ။ ခန်းမအရှေ့ဘက်ခြမ်းဆို ပြီးသလောက် ရှိပြီ” ဟု ယင်းအဆောက်အအုံအား ကန်ထရိုက်ယူ လုပ်ကိုင်နေသည့် အထက်ပါပုဂ္ဂိုလ်မှ ဧပြီ ၂၃ ရက်တွင် ပြောကြားပြီး ဗေဒါနုရောင်မသုတ်ခင်က ချောကလက်၊ အဝါနှင့် အစိမ်း ရောင် များအား အဆောက်အအုံအား ပထမ စမ်းသပ်ခဲ့ပြီး ဗေဒါနုရောင်သို့ ပြောင်းလဲသုတ် ရခြင်းဖြစ်ကြောင်း ဆက်လက်ပြောသည်။
ဧပြီလဆန်း ၁ ရက်မှ စတင်၍ ပြန်လည်ပြုပြင် မွမ်းမံခဲ့သော ရန်ကုန်မြို့တော်ခန်းမ အဆောက်အအုံသည် မေလတွင် ပြီးစီးဖွယ်ရှိသည်။ ရန်ကုန်မြို့တော် စည်ပင်သာယာရေး ဝန်ကြီးဌာန ရုံးစိုက်ရာနေရာလည်း ဖြစ်သည်။ ရန်ကုန်မြို့တော်ခန်းမအဆောက်အအုံ ဆေး ပြုပြင်နေချိန်တွင် ဝန်ထမ်းများ အနားယူခြင်းမရှိဘဲ ရုံးဆင်းရုံးတက် ပြုလုပ်လျက်ရှိ ကြောင်း သိရသည်။
Ref : News Watch weekly
No comments:
Post a Comment