အင်တာနက်သုံးစွဲသော အမျိုးသမီးများအား အဓိက ပစ်မှတ်ထားပြီး အင်တာနက်မှ တစ်ဆင့် ခြိမ်းခြောက် ငွေတောင်းမှုများ ဖြစ်ပေါ်လျက်ရှိကြောင်း သိရသည်။ အသက် ၁၉ နှစ်အရွယ် ကျောင်းသူ အမျိုးသမီးအား အမျိုးသားတစ်ဦးက ငွေကျပ်သုံးသိန်းကို သူ့ထံသို့ ပေးပို့ရမည်၊ မပေးပါက အင်တာနက်မှ တစ်ဆင့် သူမ၏ ဓာတ်ပုံများဖြန့် မည်ဟု ခြိမ်းခြောက်မှု ဖြစ်ပွားခဲ့သောကြောင့် မြောက်ဥက္ကလာပ ရဲစခန်းတွင် အမှုဖွင့် တိုင်ကြားခဲ့ရကြောင်း သူမကပြောသည်။ “သူနဲ့ တွေ့ကြတာကလည်း အွန် လိုင်းပေါ်မှာပဲ တွေ့တာပါ။ သူက ကျွန်မရဲ့ ဂျီမေးလ်ထဲကို အင်ဗိုက်လုပ်ပြီး ၀င်လာတော့ လက်ခံလိုက်တာ၊ သူနဲ့ ဂျီတော့ထဲမှာ စကားပြောဖြစ်တယ်။ နောက်တော့ သူ့ရုပ်လည်း မြင်ရအောင် ကိုယ့်ရုပ်လည်း မြင်ရအောင်ဆိုပြီး ဗီဇက်အိုမှာ ပြောဖြစ်တယ်။ နောက် သူ ချစ်ခွင့်တောင်းတယ်။ လူချင်းမတွေ့ရတဲ့အတွက် ဓာတ်ပုံတွေ ပို့ပေးပါလို့ဆိုတာနဲ့ ပုံတွေ ပို့ပေးမိတယ်။ အခုတော့ သူက သူ့ဆီကို ငွေသုံးသိန်းပို့ပေးရမယ်၊ မပို့ရင် ကျွန်မပုံတွေနဲ့ စာတွေ၊ သူနဲ့ ပြောခဲ့တဲ့ သမီးရည်းစားစကားတွေကို သူ့ဝက်ဘ် ဆိုက်ပေါ်မှာ တင်ထားမယ်လို့ပြောပြီး ခြိမ်းခြောက်တယ်။ အဲဒါ ပေးစရာ လည်းငွေမရှိဘူး၊ ကြောက်လည်း ကြောက်တာနဲ့ ရဲစခန်းမှာ အမှုဖွင့် လိုက်တာပါ” ဟု အမည်မဖော်ပြလို သော အမျိုးသမီးက ပြောပြသည်။
ခြိမ်းခြောက်သော အမျိုးသားမှာ အသက် ၃၀ ၀န်းကျင်ခန့် ရှိပြီဟု ထင်ကြောင်း၊ သူဝက်ဆိုက်တင်မည့် ပုံများမှာ သူမ၏ ပုံများအား ကွန်ပျူတာဖြင့် ၀တ်လစ်စလစ်ပုံဖြစ်အောင် ပြုလုပ်ဖန်တီးထားသော ပုံများဖြစ်ပြီး သူနှင့် အတူနေသည့် သဏ္ဌာန်ပုံများကိုလည်း ဖန်တီးထားပြီး ငွေတောင်းခြင်းဖြစ်ကြောင်း သိရသည်။
အလားတူ ဖြစ်ရပ်တစ်ခုလည်း အသက် ၃၀ ကျော်အရွယ် အိမ်ထောင်ရှင် အမျိုးသမီးတစ်ဦး ကြုံတွေ့ခဲ့ရကြောင်း ထိုအမျိုးသမီး၏ ပြန်ပြောပြချက်အရ သိရသည်။ “ကျွန်မအမျိုးသားက စင်ကာပူမှာဆိုတော့ ကျွန်မလည်း အင်တာနက်ကို သူနဲ့ စကားပြောရအောင် မကြာခဏသုံးဖြစ်တယ်။ ဂျီတော့ သုံးရင်းနဲ့ မသိတဲ့ နာမည်တစ်ခုကို လက်ခံလိုက်တာ။ အဲဒီ့လူက အသက် ၂၅ နှစ်လောက်တော့ ရှိပြီ။ သူက သူ့အစ်မနဲ့ နာမည်တူတယ်လို့ ပြောပြီး ခင်မင်အောင်လုပ်တာ။ နောက်တော့ စာတွေ အပြန်အလှန်ပို့ကြရင်း ကျွန်မ အမျိုးသား လိပ်စာကိုတောင်းတယ်။ သဘောရိုးထင်ပြီး အမျိုးသားရဲ့ ဂျီမေးလ်လိပ်စာကို ပေးလိုက်မိတယ်။ နောက်တော့ ကျွန်မနဲ့ သူအပြင်မှာ တွေ့ကြတယ်။ အဲဒီမှာ ဘယ်လိုဓာတ် ပုံရိုက်လည်း မသိဘူး။ ကျွန်မမေးလ်ထဲကို သူနဲ့ကျွန်မ တွဲနေတဲ့ပုံတွေ ရောက်လာတယ်။ ကျွန်မလည်း စိတ်တိုပြီး သူ့ကို ဂျီတော့ကနေပြောတော့ သူက အဲဒီပုံတွေ အမျိုးသားဆီ ပို့မယ်ပေါ့၊ မပို့စေချင်ရင် ငွေတစ်သိန်းပေးလို့ ပြောတယ်။ ပထမတုန်းကတော့ သူ့ကို ပေးလိုက်ဦးမလို့ပဲ။ နောက်တော့ တောင်းလို့ရရင် အမြဲတောင်းနေမှာပဲလို့ တွေးမိပြီး အမျိုးသားကိုပဲ အဖြစ်မှန် ပြောပြလိုက်တယ်၊ ကျွန်မရဲ့ မေးလ်လိပ်စာလည်း ပြောင်းလိုက် တယ်၊ အမျိုးသားဆီကိုလည်း အကျိုးအကြောင်းစုံ နားလည်အောင် ပြောပြရတာပေါ့၊ အမျိုးသားက ယုံကြည်လို့ တော်သေးတာပေါ့။ နို့မို့ရင် လင်မယားတောင် ကွဲနိုင်တယ်” ဟု သူမက အဖြစ်အပျက်ကို ပြောပြခဲ့သည်။
အင်တာနက် သုံးရင်းဖြင့် ကိုယ်နှင့်သိကျွမ်းခြင်း မရှိသော နာမည်များအား လက်မခံသင့်ကြောင်း အင်တာနက် ကျွမ်းကျင်သူ မောင်သောင်းမြတ်ထွန်းက အကြံပြုပြော ဆိုသည်။ “အင်တာနက်သုံးခြင်းမှာ အကောင်းအဆိုး သက်ရောက်မှုနှစ်မျိုး ရှိတယ်။ အပျော်သုံးတဲ့အတွက် အချို့မလိုလားအပ်တဲ့ ပြဿနာမျိုးတွေလည်း ၀င်လာတတ်တယ်။ ယောက်ျားလေးတွေအတွက် တော်ရုံပြဿနာက ဖြေရှင်းလို့ ရပေမယ့် မိန်းကလေး တွေကတော့ သတိထားသင့်ပါတယ်၊ လူတိုင်းကို လက်မခံသင့်ဘူး၊ အထူးသဖြင့် ပုံတွေအပြန်အလှန် ပို့ပေးတာ၊ ဗီဇက်အိုနဲ့ စကားပြောတာမျိုး အပြင်မှာ လူချင်းတွေ့ဖို့ ချိန်းတာမျိုးတွေနဲ့ ကြုံလာရင် ပိုပြီးသတိထားဖို့ လိုလာပြီ။ ကျွန်တော် သိရသလောက် အင်တာနက်ကနေ ပုံတွေ တင်မယ်လို့ ခြိမ်းခြောက်ပြီး ငွေတောင်းတာ ၂၀၀၇ ခုနှစ်လောက်ကတည်း ကဖြစ်နေတဲ့ ပြဿနာပါ” ဟု သူက ပြောဆိုသည်။
ချော့ကလက်မြို့တော်မှ ကူးယူဖော်ပြပါသည်။
No comments:
Post a Comment